قصيدة احنا الشعب الابنودي

اللهجة المصرية
من كل جهات المدن الخرسا
الوف شبان
زاحفين بينادوا بموت الفجر
استنوا الفجر ورا فجر
ان القتل يكف
طب ان القبضه تخف
ولذلك خرجوا يطالبوا
بالقبض على القبضه
وتقديم الكف
الدم
قلب الميدان وعدل
وكأنه دن نحاس مصهور
انا عندى فكرة عن المدن
اللى يكرهها النور
والقبر اللى بات مش مسرور
عندى فكرة عن العار
وميلاد النار
والسجن في قلبى مش على رسمه سور
قلت له لأ يا بيه
انا اسف
بلدى بربيع وصباح
لسه في قلبى هديل الينابيع
لسه في صوتى صهيل المصباح
لسه العالم حي رايح جي
بيفرق بين الدكنه وبين الضى
بلدى مهما تتضيع مش حتضيع
ما ضايع الا ميدان وسيع
احنا الشعب
بتوع الأجمل والطريق الصعب
احنا الشعب
بتوع الضرب ببوز الجزمه وسن الكعب
احنا الشعب
بتوع الأجمل والطريق الصعب
احنا الشعب
بتوع الضرب ببوز الجزمه وسن الكعب
ولا باعرف ابكى صحابى غير في الليل
انا اللى واخد على القمر
ومكلمه اطنان من الشهور
واللى قتلنى ما ظهر له دليل
وفى ليله التشييع
كان القمر غافل مجاش
والنجم كان حافل
لا بطل الرقصه ولا الارتعاش
واما بلغنى الخبر
اتزحم الباب
اتخاطفونى الأحباب
ده يغسل.. ده يكفن.. ده يعجن كف تراب
وانا كنت موصى لا تحملنى الا كتوف اخوان
اكلوا على خوان
وما بينهمش خيانه ولا خوان
والا نعشى ما ينفدش من الباب
ما اجمل نومه على كتوف اصحابك
تعرف صادقك من كدابك
تبحث عن صاحب انبل وش
في زمن الغش
احنا الشعب
بتوع الأجمل والطريق الصعب
احنا الشعب
بتوع الضرب ببوز الجزمه وسن الكعب
احنا الشعب
بتوع الأجمل والطريق الصعب
احنا الشعب
بتوع الضرب ببوز الجزمه وسن الكعب
بصيت وحاسب نفسى بين خلانى
تعالوا شوفوا الدنيا من مكانى
حاشتنا اغراض الحياه عن النظر
بالرغم من نبل الالم والانتظار
اتعلمنا حاجات اقلها الحذر
ونمنا سنوات مدهشه
نحلب ليالى حلمنا المنتظر
وامتلات الأسواق بالمواكب
تبيع صديد الوهم والمراكب
فارشه بالوطن على الرصيف
بالفكر والجياع وبالعناكب ومذله الرغيف
انتوا التوقيف واحنا السير
انتم لصوص القوت
واحنا بنبنى بيوت
احنا الصوت ساعه ما تحبوا الدنيا سكوت
ايوه الصوت ساعه ما تحبوا الدنيا سكوت
احنا شعبين شعبين شعبين
شوف الأول فين؟
والتانى فين؟
وآدى الخط بين الاتنين بيفوت
انتم بعتم الارض بفاسها بناسها
في ميدان الدنيا
باتت وش وضهر
بطن وصدر
والريحه سبقت طلعت انفاسها
احنا الشعب
بتوع الأجمل والطريق الصعب
احنا الشعب
بتوع الضرب ببوز الجزمه وسن الكعب
احنا الشعب
بتوع الأجمل والطريق الصعب
احنا الشعب
بتوع الضرب ببوز الجزمه وسن الكعب
واذا كنت لوحدى دلوقت
بكره مع الوقت
حتزور الزنزانه دى اجيال
واكيد فيه جيل
اوصافه غير نفس الأوصاف
ان شاف يوعى
وان وعى ما يخاف
انتم الخونه حتى لو خانى ظنى
خد مفاتيح سجنك وياك واترك لى وطنى
وطنى غير وطنك
ومشى
قلت لنفسى
ما خدمك الا من سجنك

الافضل ان تسمع الاغنية وتستمتع بالقصيدة

https://www.youtube.com/watch?v=UpuUZbkyN8A

دانيال النجار (alnajjar alnrges)Google إجابات-العالم العربي-الشعر-مصر


أكثر...