أنا وأختي :/ بدي حل ساعدوني :(

السلام عليكم يا جماعة..

يا جماعة مشكلتي مع أختي.. أختي أصغر مني بسنة.. وأنا وإياها مندرس في دولة تانية يعني أنا وإياها ساكنين لحالنا، معنى كمان بنفس السكن بنات عمتي برضو خوات..
هلأ أنا وأختي لحال بغرفة وهمي لحال..
المهم أنا وأختي كتييير كتتييررر منتزاعل.. ما بيطبق دماغي ع دماغها.. أكتر من مرة حكينا وتفاهمنا بس منرجع منتزاعل.. أنا بشوفها بتتعامل مع البنات الغرب بطريقة كتير لطيفة ومعي أنا بجفاصة وقلة زوق وبخل مو طبيعي..تخيلو إنو عمستوي مثلثات الجبنة بتعدهم و بتقول إلك هلقد وإلي هلقد :/ (أنا ماخدة راحتي بالحكي لانو ما حدا بعرفنا، ولا أنا ما بطيبلي حدا يعرف إنو أختي هيك طبعا شو ما صار ) . ولما بكون عليها امتحانات بتتضايق وبتتفشش فيي..
قلتلها عن هاي النقطة.. قالتلي إنتي أختي بتتحمليني، بس الناس الغرب ما بتحملوني oO قلتلها الأقربون أولى بالمعروف بتتحسن يومين وبترجع متل ما كانت.. الصراحة أنا بحسها بتغار مني.. أنا كشكل أحلى منها والناس لما منكون مع بعض بتمدح شكلي أنا، وبقولو مو مبين عليكم اخوات (بتزكر مرة قالتلي خلص مو ضروري تحكي إنا خوات، أنا بعرفها ع صحباتي بس والله) هاد مو معناتو إنها بشعة بالع** والله هي أمورة.. ومن أيام المدرسة كنت أشطر منها بالدراسة وبابا وماما كانوا يمدحوني ويحكو ما تصيروا زيها ومن هل حكي.. بعرف هاد حكي ولاد صغار وأنا طبعا متضايقة ومش مبسوطة بس عم بحاول ألاقي تفسيرات للي بصير.. أنا ما بقول إني ملاك طبعا أنا كمان بغلط.. أغلب المرات أنا برجع أصالحها.. حتى لما بتكون هي سبب المشكلة..
بعرف المشاكل طبيعي تصير.. بس مو لهل درجة وبهل كم هاد.. أغلب الأوقات منكون ما منحكي مع بعض.. والله صرت أستحي من بنات عمتي.. لإنهم همي ما شاءالله متفقين كخوات.. مو متلنا متل الشحمة والنار..

أنا تعبببت والله تعبت..
وبابا بالفترة الأولى كانت تحكي هي معو لأتفه الأسباب والله، يعني مرة كنت مشغلة فيديو والله طولو أقل من دقيقتين وصارت ترفع صوتها إنو مزعج وما بعرف شو وتروح تحكي مع بابا!! خلص الفيديو قبل ما ترن.. بعدين بطلت أسلوب إنو تحكي مع بابا..
وماما مشغولة بتيتى المريضة الله يشفيها..

خايفة عنجد نبطل نحب بعض.. وهل تراكمات اللي بتصير ما بدي إياها تبعد بينا هلا وبالمستقبل.. على فكرة هيها قاعدة قبالي هلأ وصارلنا يومين ما منحكي.. إحنا متعودين اللي بفوت عل غرفة يدق الباب ويسلم.. أنا لساتني بدق الباب احتراما لنفسي وإلها.. هي بتفوت متل الهجوم لا بدق الباب ولا ما يحزنون، يعني ماخدة الشغلىة جد :/

سامحوني عل إطالة، ولو في أخطاء بالحكي، وأفكاري مش مرتبة بعرف.. وبدي نصيحة تفش القلب أمشي عليها، وإزا ما لقيت نصيحة مفيدة رح أضل أنزل هل سؤال لحد ما ألاقي..

شكرا كتير.

بدون اسمالأسرة والطفل-العلاقات الإنسانية-المشاكل الاجتماعية


أكثر...