ما هى الاجراءات المطلوبه فى حالة الاصابه فى الجيش أثناء تأدية الخدمه العسكريه (مصر) ؟

الاصابه فى الجيش المصرى
يا جماعه انا بكتب الموضوع ده عشان اللى عاوز يسأل على حاجه فى حالة اصابته أثناء الجيش يعرف موقفه وعشان مايدوخش على مايعرف معلومه زى منا دوخت ..
أولاً فى فرق بين الاصابه أثناء تأدية لخدمه العسكريه (أثناء الخدمه) بسببها وبدون سببها .. بدون سببها دى يعنى اتصبت مثلاً وانت نازل اجازه أو خلالها عملت حادثه أو وانت فى الجيش حتى واتصبت مع نفسك وانت ماشى كده وفى الحاله دى بيبقا ملكش حقوق غير ان الجيش يعالجك وممكن تخش لجنة رفد طبى وتطلع لو حالتك ماتسمحش انك تكمل..
أما فى حالة الاصابه أثناء الخدمه وبسببها ففى الحاله دى بتخش لجنة رفد طبى وبيتكب فى التقرير حالتك ونسبة العجز اللى سببتهولك الاصابه ولو النسبه كبيره لا قدر الله بيبقا ليك معاش شهرى وبتتصرفلك مكافأه (بتختلف القيمه حسب المؤهل) من ادارة التأمينات والمعاشات بالقوات المسلحه (اللى فى مدينة نصر) بيبعتولك جواب خلال شهرين من استلامك لشهادة الجيش فيه الورق المطلوب منك عشان يبدأوا يصرفولك المعاش ,أول مره بيجيلك جواب فيه شيكين واحد للمكافأه وواحد لأول شهر معاش بعد كده معاشك بييجى على أقرب بوسطه ليك بيبقا فى شباك خاص لمعشات القوات المسلحه بتقبض منه والقبض بينزل يوم 10 غالباً..
بعد كده ممكن تروح السجلات العسكريه تطلع نموذج اصابه (نموذج 51س اصابه) ودا بيبقا مكتوب فيه كل حاجه عن اصابتك وتاريخها ونسبة العجز....... كل البيانات دى متسجله عندهم على الكمبيوتر ,ملحوظه تروح أى يوم بدرى عشان تطلعه لأن الشباك اللى بتعمله منه بيقفل قبل الساعه 11 تقريباً .. وممكن كمان تطلع بطاقه علاجيه وبيتحددلك فيها أقرب مستشفى ليك تبع الجيش تتعالج فيها ..
بعد كده بتروح هيئة التنظيم والاداره بالقوات المسلحه (العباسيه) وتاخد معاك كل الورق المتعلق بيك (شهادة الجيش ونموذج الاصابه والبطاقه وشهادة ميلاد كمبيوتر وكذا صوره من كل الورق ده) عشان تعمل طلب وظيفه لأن بيبقا ليك الحق فى التعيين .. بيدولك ورق تملاه وتختمه من كذا حته, وبيحولوك على مستشفى العجوزه عشان يطلعولك شهادة تأهيل مهنى (بتروح بعد اسبوع تطلعها وتاخدها من المستشفى) وتصورها وتسلم صوره منها مع بقية الورق المطلوب فى التنظيم والاداره وتحتفظ بالأصل معاك ..

بدون اسمGoogle إجابات-مصر


أكثر...